Consomes ou Devoras? Consumo responsábel, xusto e ecolóxico

Publicado o número 9 de Cos Pés na Terra

Vén de se publicar o número oito/nove da revista dixital Cos Pés na Terra. Inclúe unha crónica da participación de Michael Löwy e Joaquim Sempere na XXVII Semana Galega de Filosofía e artigos verbo do decrecemento, o esgotamento dos recursos minerais a escala global, a loita labrega contra unha explotación mineira na Terra Chá, a condena das transnacionais galegas Calvo e Pescanova polo Tribunal Permanente dos Pobos, a conservación do lobo ibérico e a achega da enerxía eólica en Galiza á loita contra a mudanza climática. O editorial está dedicado á crise da biodiversidade. Os libros reseñados neste número son “Colapso” e “La historia cuenta. Del crecimiento económico al desarrollo humano sostenible”.

Guía para o consumo responsábel de roupa - CRL

A campaña Roupa Limpa, impulsada por Setem no Estado español e por Amarante en Galiza, ten unha Guía de Consumo Responsábel de Roupa descarregábel en formato .pdf. A guía, que ademais de consellos ofrece unha valoración xeral das principais empresas do téxtil, ten como eixos os direitos humanos e o ambiente.        

Revista Opcións

O obxectivo principal da revista Opcions, editada polo CRIC, é ofrecer unha ferramenta útil para a práctica do consumo consciente (consumo responsable). Emprega unha linguaxe clara que se poida entender sen necesidade de coñecementos previos. O Centre de Recerca i Informació en Consum (Centro de Investigación e Información en Consumo, CRIC) é unha asociación cidadá sen ánimo de lucro. Naceu, en 1996, dunhas cantas persoas que se preguntaban se as repercusións do seu consumo podían ser contraditorias coas súas ideas. Publicaron catro libros e fixeron numerosas charlas sobre consumo responsable. Actualmente a súa actividade céntrase na edición da revista Opcions e en dar charlas e cursos. Accede aos seus contidos

Guía de consumo responsábel de peixe

Greenpeace-España ten unha Guía de Consumo Responsábel de Peixe que complementa con información sobre Mercados Pesqueiros. A Guía de Consumo aborda a etiquetaxe, recolle dados sobre as especies máis consumidas, achega informes e propón cinco criterios para o consumo responsábel de peixe: aproveitalo ben, rexeitar inmaduros, priorizar o máis achegado,  optar polos métodos selectivos de pesca e escoller selvaxe frente a acuicultura. A sección web sobre Mercados Pesqueiros inclúe unha Lista Vermella de Especies Pesqueiras (tamén descarregábel), información sobre especies e técnicas pesqueiras, consellos para distribuidores e unha avaliación das políticas de compra dos principais destes.

Guía de alimentos transxénicos

Greenpeace publica a súa guía sobre productos que conteñen ou non transxénicos no que se ten convertido nunha referencia á hora de facer un consumo responsábel. Os cultivos transxénicos utilizados para alimentación humana na UE son fundamentalmente algunhas variedades de millo e de soia. Por iso nesta guía figuran sólamente alimentos que conteñan polo menos un ingrediente ou aditivo producido a partir destes cultivos. Algúns exemplos de ingredientes e aditivos derivados do millo e da soia, e xa que logo "sospeitosos" de ter unha orixe transxénica, son: * Soia: fariña, proteína, aceites e graxas (a miúdo escóndense" detrás da denominación aceites/graxas vexetais), emulgentes (lecitina-E322), mono e diglicéridos de ácidos grasos (E471), acedos grasos. * Millo: fariña, almidón*, aceite, sémola, glicosa, jarabe de glicosa, fructosa, dextrosa, maltodextrina, isomaltosa, sorbitol (E420), caramelo (E150), grits. ("Almidón modificado" fai referencia a unha transformación físico-química sen relación cos transxénicos.) Accede á guía dende a web de Greenpeace

A calidade do aire en Galicia: Balanzo 2008

Segundo o informe de Verdegaia e Ecologistas en Acción "A calidade do aire en Galicia. Balanzo 2008", baseado en datos divulgados pola Xunta, practicamente en todas as principais cidades galegas se incumpren os valores recomendados pola Organización Mundial da Saúde (OMS) para as partículas inferiores a 10 micras (PM10), o contaminante atmosférico máis preocupante desde o punto de vista da saúde humana. O informe tamén denuncia que a Consellaría de Medio Ambiente, Territorio e Infraestruturas oculta información sobre a calidade do aire no contorno dalgunhas industrias contaminantes. Aínda que, segundo os datos da Xunta, en 2008 só se  rexistrou unha superación dun valor límite legal -para PM10, na cidade da Coruña-, incumpríronse en practicamente todas as principais cidades valores recomendados pola OMS, máis esixentes que os legais en vigor. Para PM10 houbo incumprimentos na Coruña, Ferrol, Lugo, Ourense e Vigo. Para PM2,5 (partículas inferiores a 2,5 micras)  na cidade de Vigo e na estación de San Vicente de Vigo (da rede da central térmica de Meirama, situada en Cambre). E tamén para outro contaminante, o dióxido de nitróxeno (NO2), na Coruña. O tráfico é a principal causa de deterioración da calidade do aire nas cidades. Verdegaia e Ecologistas en Acción denuncian que a Xunta continúa sen cumprir as   disposicións   sobre   información   ao   público   contidas   na normativa   de   calidade   do   aire. En particular, cómpre destacar que non se está a divulgar nin un só dos datos sobre a calidade do aire obtidos nas estacións de medición situadas no contorno dalgunhas industrais contaminantes: Cementos Cosmos (Sarria), central térmica de Sabón (Arteixo), Ferroatlántica-Sabón, Ferroatlántica-Dumbría, Finsa (Santiago), Materiales del Atlántico (Narón) e a incineradora de SOGAMA (Cerceda).  Aínda que a rede galega de estacións que miden a calidade do aire non permite unha boa avaliación dos problemas de contaminación atmosférica, pódese afirmar que os habitantes das cidades e dalgúns contornos industriais respiran aire contaminado nocivo para a súa saúde. No conxunto de España, segundo o Ministerio de Medio Ambiente e do Medio Rural e Mariño, prodúcense 16.000 mortes prematuras ao ano relacionadas coa contaminación atmosférica. Verdegaia e Ecologistas en Acción reclaman novas políticas territoriais e de transporte que reduzan drasticamente o tráfico nas cidades e as súas áreas de influencia. É necesario deixar de enterrar grandes sumas de diñeiro en ampliacións da capacidade viaria que só alivian por un tempo os problemas de conxestión e restrinxir fortemente o uso do vehículo privado, principal causa de degradación da calidade de vida no ámbito urbano. Ao mesmo tempo, cómpre potenciar todo o posible os desprazamentos a pé e en bicicleta  e o transporte colectivo. Descarga aquí o informe: A calidade do aire en Galicia.Balanzo 2008