O pleno do Parlamento Europeo reclamou nun informe adoptado este xoves medidas urxentes para reducir á metade de aquí a 2025 o malgasto de alimentos na UE por exemplo diversificar o tamaño dos envases, clarificar as datas límite de consumo, introducir obxectivos nos Estados membros para reducir os residuos alimentarios ou introducir unha materia sobre alimentación en todos os niveis de ensino para concienciar deste problema.

A metade dos alimentos que compran tíranse ao ano no conxunto da Unión Europea, onde con todo viven 79 millóns de persoas por baixo do limiar da pobreza e 16 millóns dependen da caridade, segundo datos da Comisión Europea.

Cada europeo produce 179 quilos de residuos alimentarios ao ano, o que supón un total de 89 millóns de toneladas no conxunto dos Estados membros na actualidade, aínda que o Executivo comunitario prevé que estes aumenten de aquí a 2020 se non se toman medidas para evitalo ata os 126 millóns de toneladas, é dicir, un 40% máis. Polo menos o 60% do malgasto producido por particulares podería evitarse, segundo estimacións de Bruxelas.