Os días 24 a 26 de Abril celebráronse en Santiago de Compostela, na Faculdade de Matemáticas da USC, as Xornadas "Cosumo Responsable e Cambio Climático", organizadas por Amarante e a USC coa colaboración da Dirección Xeral de Cooperación Exterior da Xunta de Galicia. Case que un cento de persoas participaron e fecharon as xornadas xunha carta á comunidade universitaria que di como segue:
"Nós, alumnas e alumnos da universidade de Santiago de Compostela que participamos no Seminario "Consumo Responsable e Cambio Climático" pensamos que o cambio climático é un problema global que afecta especialmente aos países do sur, cos cales temos unha enorme débeda ecolóxica e económica. Que o consumo responsable ten un gran potencial a hora de loitar contra o cambio climático e para evitar o colapso ambiental cara a que imos. Un potencial transformador que é preciso aproveitar traballando a prol dun novo paradigma social, económico e medioambiental que permita trocar a relación histórica Norte-Sur. Somos conscientes de que é preciso un cambio de rumbo, un xiro "copernicano" e que debemos avanzar nel facendo que cada persoa poida participar de forma individual e colectivamente coas súas accións diarias. Baixo unha filosofía: pensar globalmente e actuar localmente.
Desexamos rachar coas vellas estructuras de pensamento occidental tanto colectivas coma individuais que nos leve cara "o outro mundo posible" no que poidamos:
- Facer máis con menos.
- Recampesinizar.
- Camiñar cara a sustentabilidade ecolóxica.
- Adquirir un compromiso colectivo e individual cos nosos conxéneres.
- Definir novos modelos educacionais: educación ambiental, solidaria e non sexista.
- Democratizar as estructuras sociopolíticas.
- Colectivizar e incidir na sociedade a través da acción social.
O consumo responsable non é so unha posibilidade senón que é un exercicio de responsabilidade que desde as institucións públicas en xeral e desde a Universidade se Santiago de Compostela en particular débese poñer en práctica. Pero non se de forma puntual, senón de forma estructural, cambiando a cultura do consumo por outra do aforro. Para todo, queremos facer propostas concretas, tanto a institución universitaria como as nosas compañeiras e compañeiros de estudios porque creemos que desde a acción individual e colectiva temos moito que facer. Algunhas destas propostas son:
- Aforrar enerxía instalando de sensores de movemento que so acenden as luces cando sexa preciso e a través da colocación de calefacción na súa xusta temperatura optimizando recursos e combustible.
- Aforrar auga instalando surtidores e non billas.
- Aforrar recursos cambiando o papel branco por reciclado e que todo sexa utilizado polas dúas caras. Que os profesores así o esixan e así o fagan. Que se priorice o formato electrónico sobre o soporte en papel.
- Construír diferente: tendo en conta criterios de bioconstrucción, aproveitar a enerxía do sol a través da boa orientación dos edificios ou da instalación de máis ventás. Instalar enerxías renovables.
- Investigar diferente: favorecer a investigación en enerxías renovables.
- Facilitar e aforrar na mobilidade urbana a través da mellora do transporte público de acceso a universidade e a potenciación no uso da bicicleta para o alumnado, con carril bici e aparcadoiros.
- Alimentarnos mellor, introducindo produtos de agricultura ecolóxica e comercio xusto nos comedores, cafeterías e máquinas expendedoras.
- Reinventar o consumo promovendo rastrillos e mercados de troco e o uso de produtos de segunda man entre os estudantes: incluso de apuntes, libros, documentación, material de papelería, mobiliario, etc. Propoñemos a creación dun banco de fotocopias.
- Aprender de outra maneira introducindo na formación universitaria máis contidos sobre consumo e cambio climático e facendo máis actividades de sensibilización a través de xornadas e convivencias sobre consumo responsable.
- Ter en conta o impacto ambiental e a pegada ecolóxica de todos os equipamentos que adquire a universidade pudendo así coñecer a débeda que estamos adquirindo cos países do sur, axudándonos así a tomar medidas.
- Organizarnos en colectivos de consumo e redes sociais de intercambio de coñecementos e obxectos, de consumo de alimentos e produtos de comercio xusto e agricultura ecolóxica.
- Tirar de outra maneira, reducindo os residuos. Separándoos correctamente, reutilizando e reciclando cando non quede outra alternativa.
- Relacionarnos e interactuar coas persoas que veñen de Erasmus, coñecer novas realidades e novas ideas que nos axuden a profundizar co consumo responsable.
- Loitar contra a privatización da universidade e impedir a entrada dos intereses privados no ensino público.
Pedimos, a tódolos membros da comunidade universitaria teña en conta estas propostas a fin de construír, xuntos e xuntas, un mundo mellor en termos de xustiza social, sustentabilidade ecolóxica e paz."
Fonte: comercioxusto.com