Consomes ou Devoras? Consumo responsábel, xusto e ecolóxico

Norte Forestal (NORFOR), filial do grupo ENCE responsábel da xestión de máis de 11.000 hectáreas de montes (a maioría deles eucaliptais situados en Galiza), perdeu a certificación FSC o pasado 7 de Xaneiro. Esta decisión é fruito do traballo de seguimento e presión desenvolvido por diversas organizacións ecoloxistas nos últimos anos. Unha destas entidades, Verdegaia, felicitouse pola retirada do selo, se ben lamentando a demora, xa que a decisión chegou ao comezo do ano no que o certificado ía caducar.

Xunto con NORFOR, tamén perdeu o certificado FSC Silvasur, outra filial do mesmo grupo. Ambas conservan, embora, a menos exixente certificación PEFC.  Verdegaia acha probábel que ENCE volte tentar obter o selo FSC —xa que é unha demanda das empresas do Norte de Europa que mercan a súa pasta de papel— e denuncia que para iso está a procurar debilitar os estándares FSC vixentes no Estado español.