Consomes ou Devoras? Consumo responsábel, xusto e ecolóxico

Ás 16 horas e 50 minutos do martes 19 de abril, España entrará en déficit ecolóxico. É dicir, esgotaría en algo menos de cinco meses todo o orzamento ecolóxico de que dispón a economía española no conxunto do ano, entendendo por orzamento ecolóxico o equilibrio perfecto entre a riqueza ecolóxica que destrúe e a capacidade do sistema de xerar ou rexenerar o sistema ecolóxico. Ese equilibrio mídese en termos de hectáreas globais por habitante: a superficie que se necesita para producir os recursos consumidos e, á súa vez, a superficie que o país é capaz de rexenerar. Iso inclúe a superficie destinada a cultivos, a pastos para gandería, bosques, pesca, emisións de carbono e superficie urbana construída. Se un país necesita para satisfacer o seu consumo máis espazo do que é capaz de rexenerar, dise que está en déficit ecolóxico.