O representante máis coñecido de banca ética en Europa, Triodos Bank ven de inaugurar a súa delegación territorial en Galicia. Fundado en 1968, leva operando no estado español desde 2004 baseando a súa filosofía na aplicación de criterios éticos no desenvolvemento das súas operacións bancarias. A pesares de ser un banco no sentido tradicional do termo no que o seu obxectivo é acadar beneficios, estes deben de provir do financiamento unicamente de sectores sostibles e da economía real, que ademais de ser rendibles benefician ás persoas e o medio ambiente: enerxías renovables, agricultura ecolóxica, bioconstrución, turismo sostible, actividades culturais, educación, cooperación ao desenvolvemento, organizacións de apoio a persoas con discapacidade ou a grupos en risco de exclusión social, etc.
Na súa páxina web podedes consultar os seus criterios positivos de financiamento e os criterios excluentes como son entre outros industria armamentística ou nuclear, proxectos de agricultura intensiva, peletería, enxeñería xenética, rexímenes ditatoriais ...
A presenza de Triodos no noso país ven a sumarse a iniciativas como Fiare GZ, asociación xermolo dun proxecto de banca ética de ámbito estatal e Coop57, cooperativa de servizos financeiros para fomentar o aforro solidario e o investimento ético no desenvolvemento de proxectos de economía social e solidaria.