O Atol de Midway, territorio baixo soberanía dos EUA situado no Pacífico Norte, a meio camiño entre Asia e América, declarado Refuxio Nacional da Vida Selvaxe e parte do Monumento Nacional Mariño Papahānaumokuākea, é a morada de milleiros de aves mariñas como o albatros de Laysan (Phoebastria immutabilis) que concentra alí arredor do 70% da súa populación. Cada ano ducias de milleiros de pitos de albatros morren de fame, intoxicación e asfixia ao seren alimentados por seus pais con lixo recollido no mar. Chris Jordan fotografou os pitos mortos de albatros tal e como os atopou, cos seus estómagos cheos de residuos de orixe humana.