Sindicatos e ONGs asiáticas alíanse para lanzar Asian Floor Wage, unha campaña internacional na defensa de salarios dignos na industria téxtil en Asia. A iniciativa é apoiada en Europa pola Campaña Roupa Limpa, coordenada en Galiza por Amarante.
A industria téxtil, mediante a competencia entre mercados laborais precarios e inxustos, mantivo os salarios a níveis de miseria durante décadas, de modo que hoxe unha obreira da confección en Asia cobra unha media de 2 dólares por unha xornada de 8 horas que se incumpre sistematicamente chegando a superar as 14 nos momentos de máis traballo. Calcúlase que para equiparar a capacidade de compra dunha operaria media da UE, unha bengalí debería cobrar uns 8 dólares diarios.